LAPU-LAPU CITY-Nipahimangno ang Lapu-Lapu City Mayor nga si Junard “Ahong” Chan sa mga opisyal sa Barangay Bankal nga sila ang manubag sa wala makolektang basura sa ilahang lugar.
Nipagawas sa pahimangno si Chan human kini nakadawat og daghang mga reklamo kalabot sa wala makolektang basura nga nagtapok na sa barangay.
Dugang pa sa Mayor nga ang dakbayan, pinaagi sa Solid Waste Management Office (SWMO), mahimong moisyu og ‘citation ticket’ batok sa barangay ug pamultahon kini.
Giklaro usab ni Chan nga ang pagkolekta sa mga basura responsibilidad sa dakbayan ug barangay ug dili sa siyudad lamang.
Si Chan niingon nga aduna silay mga inspektor gikan sa SWMO nga nag-inspeksyon sa mga barangay nga adunay wala makolektang basura, diin magpakuha kini og mga litrato ug mag-issue og citation ticket ngadto sa barangay aron masilutan.
Gibutyag sa mayor nga niadtong Hulyo, nakadawat ang siyudad og tulo ka citation ticket gikan sa SWMO.
Giingon nga gimanduan sa suspended Bankal Barangay Captain nga si Eduardo Cuizon ang iyahang mga sakop sa dili pagpangolekta sa ilahang mga basura.
Apan, kusganong gihimakak kini ni Cuizon sa dihang gipangayuan sa iyahang habig.
Sa gisaysay pa ni Cuizon nga wala kini nagmando sa iyahang mga sakop nga dili mangolekta sa mga basura.
Gibutyag usab ni Cuizon nga kaniadtong tuig 2022, ang iyahang gisakopan nga barangay gihatagan og “Seal of Good Local Governance” diin nag-inusarang bugtong nga barangay sa dakbayan nga nakadawat sa maong pasidungog.
Nihagit pa ang kapitan nga duawon ug lantawon ang tibuok barangay sa Lapu-lapu kon ang iyahang lugar ba ang kinahugawan.
Kahinumduman, nga nasuspenso si Cuizon uban ang iyahang mga konsehal sulod sa unom kabuwan human anaay nireklamo ug nasang-at sa Ombudsman.
