CEBU CITY-Subsub karon ang pagsakmit sa mga tikasan nga mga timbangan o wala na calibrate sa mga kamerkadohan sa Sugbo.
Kini ang gipahibaw ni Junil Matugina, ang market administrator. Matud niini nga ila kining gihingusgan karon sa Market Operation Division ang pag-inspeksyon ug pagpanakop sa kamerkadohan.
Kini human usab nga nakadawat ang ilang opisina og mga reklamo sa mga konsumidor nga nakapalit og tinikasan sa timbang.Gani matag-adlaw makakumpiskar matud pa ang Market Operation Division ug ubay-ubay nga mga timbangan sa isdaan, karnerhan ug ingon man sa prutasan.
Makabayad og 500 pesos ang vendor nga nanikas aron sa paglukat sa iyang timbangan sa unang higayon kini nga masakpan. Kung madakpan kini sa ikaduhang higayon, usa na ka libo ka pesos ang bayad niini apan kung sa ikatulo na nga higayon, pasakaan na og kaso ang vendor ug dili na makatinda pa.
Gihimug-atan ni Matugina nga kini usab ang direktiba karon ni Cebu City Mayor Edgardo Labella aron nga mahunong kining maong kabuang ug musalig na pagbalik ang publiko.
Hinoon, wala pa matino kung subli ba nga ibutang ang ‘timbangan ng bayan’ kung diin mao kini ang sukdanan sa mga customer kung sakto ba sa timbang ang ilang napalit sanglit taud-taud na usab kini nga nawala. | Reports from Bombo Jun Salde
