CEBU CITY — Namahayag ang usa ka International Human Life Advocate nga daan nang gibarugan sa hugpong sa mga doktor ang pagsupak niini sa legalization sa marijuana isip tambal.
Kini subay na sa gihimong prayoridad sa Kongreso ang pagpalabang sa medical marijuana bill human nga giwagtang sa World Health Organization (WHO) ang maong dahon isip dangerous drugs.
Matud ni Dr. Rene Josef Bullecer nga gawas sa mga doktor gikan sa Philippine Medical Association, supak usab ang pipila ka mga religious organizations kabahin sa paggamit sa medical marijuana.
Kini gumikan kay daghan ang nag-abusar sa paggamit niini ug daghan usab ang naadik gumikan niini.
Sumala pa niini nga ang active ingredient nga tetrahydrocannabinone o THC maoy nakaapekto sa dopamine sa utok maong malahi ang iyang behavior.
Apan nakita sa usa ka manlalaban nga daghang mga krimen nga namugna gumikan sa paggamit sa usa katawo ug marijuana hinungdan nga dili kini angayan nga himuon nga legal sa Pilipinas.
Gibutyag ni Atty. Clarence Paul Oaminal, kanhi drug czar, nga ang paggamit ug marijuana ang mahimong agi-anan usab sa paggamit ug shabu.
Matud pa nga mismo si Senate President Vicente ‘Tito’ Sotto III ang mubabag sa ‘legalization’ niini gumikan kay wala kini maayong ikahatag sa mga Pilipino.
Sigon pa ni Atty Oaminal nga dili tinuod nga tambal ang marijuana diin wala kini basihanan, ug walay pagtuon kalabot niini.
Subay niini, mi-awhag si Oaminal sa publiko nga mahimong magbinantayon sa mga kongresista nga mu-uyon nga himuong legal ang paggamit ug marijuana sa nasud. (Bombo Suzzette Rafols/Gian Navarro)
