Gihimug-atan sa Secretary General sa Sanlakas Cebu ang kamahinungdanon sa pagpahigayon og imbistigasyon ni Cebu Governor Pamela Baricuatro sa quarry operation sa dakbayan sa Toledo.
Matud ni Teody Navea nga importante kini lakang hilabi na nga dako na og kapildihan particular na sa kinaiyahan diin kung grabe ang quarry operation kay dako usab kini og peligro sa kayutaaan sa Sugbo.
Gipaambit usab niini nga usa ang Cebu sa mga kuhaanan og mga raw materials sa paghimo og reclamation projects diin napasabot nga nagkinahanglan kini og daghan nga gravel and sand ug uban pang minerales nga magamit sa reclamation.
Dugang niini nga agresibo ang development sa Toledo diin giingong adunay kasamtangang major reclamation nga nagkinahanglan og daghang materyales.
Kahinumduman nga nimando si Governor Baricuatro sa Provincial Legal Office, gipinangulohan ni Atty. Guiller Ceniza, nga tun-an ang petisyon nga gisumitir sa grupo sa mga nagprotesta gikan sa Toledo City nga miadto sa Kapitolyo niadtong Miyerkules, aron ipaabot ang mga kabalaka bahin sa quarrying activities sa ilang lugar.
Ang pito ka pahina nga petisyon nagdetalye sa mga reklamo sa nagkalain-laing sektor sa Toledo, lakip na ang mga grupo sa kababayen-an, mag-uuma, mangingisda, ug mga small-scale sand extractors.
Matod sa mga petitioners, nga nagpadayon ang unregulated quarrying sa daplin sa suba sa Toledo, bisan kung adunay moratorium, nga nagbutang sa kasikbit nga mga komunidad sa peligro.
Ila usab nga gikataho ang paglapad ug paglawon sa suba, nga naghatag og dakong risgo sa mga residente.
