CEBU CITY – Temporaryong gisuspenso sa Cebu City Government ang pagbakuna sa 5 anyos ngadto sa 11 anyos gumikan sa kakuwang sa bakuna, kagahapong adlawa, Lunes, Pebrero 21, 2022.
Kini ang gibutyag ni Dr. Jeffrey Ibones, pangulo sa Cebu City Health Department human dul-an na sa 3,000 ka mga minors sa maong age bracket ang nabakunahan sa nakalabay nga semana.
Nasayran nga 200 nalang ka doses ang nahabilin nga gitagana alang sa first dose.
Matod pa ni Ibones nga aduna may 3,000 ka mga doses nga anaa sa storage facility sa dakbayan sa Sugbo apan gitagana kini alang sa secod dose sa mga minors ug marelease kini human sa 21 ka adlaw.
Kahinumduman, nga lahi ang dosage sa bakuna sa mga menor de edad itandi sa mga hamtong bisan paman pareho kini og brand.
Gumikan sa kakuwang sa supply sa bakuna ug kahadlok nga basin magpunsisok unya ang mga ginikanan sa nagkdaiyang vaccination site nga way mahimo, nakadesidir ang CHD nga temporaryo una nga ipahunong ang vaccination roll out.
Apan, ipadayon gihapon sa dakbayan ang pagpabakuna sa mga bata sa nahabilin 200 ka doses apan kadto lang naka-schedule ang na-akomodar.
Gibutyag ni Ibones nga nisuway na kini og hangyo sa Department of Health(DOH ) nga agmiton ang 3,000 ka doses nga anaa sa storage apan gibaliran kini gumikan dali ra kaayo modagan ang panahon og dili unya kini mahulipan o mapun-an og bag-o.
Gumikan niini, mohangyo ang syudad sa DOH og dugang dosis aron mapadayon ang pagpamakuna.
