CEBU CITY — Hugtanong gihimakak ni Cebu City Councilor Niña Mabatid ang pasangil diin gituohang gikumbinsir niini ang tulo ka mga biktima nga bakwi-on ang ilang sexual harrassment complaint batok ni Department of General Services Division Head Lorenzo Basamot.
Kini subay na sa nanggawas nga mga taho diin, matud pa, gi-akusahan nilang Ramil Ayuman ug Pastor Alcover Jr. si Mabatid nga midapig ngadto ni Basamot kinsang gipasanginlang nanghinol sa tulo ka mga empleyado sa Cebu City Hall.
Matud ni Mabatid nga pulos mga bakak ang pamahayag nilang Ayuman ug Alcover, kinsang pulos mga sakop sa Barug-PDP Laban, kalabot na sa giingong pag-withdraw sa kaso sa mga biktima.
Dugang pa niini nga imposible kining mosimpatiya ngadto ni Basamot ilabi na nga siya ang mi-awhag sa mga tulo ka mga babaye nga moduso og reklamo.
Paaboton na lang usab ni Mabatid ang resulta sa imbestigasyon sa City Legal Office kalabot na sa posibleng aksyon ngadto ni Basamot, ingon man ang pagduso sa maong reklamo sa korte.
Kasamtangang gidumala karon ni Mabatid ang Committee on Women, Children and Family Affairs. (Gian Navarro)
