Motanyag ang Presidential Anti-Organized Crime Commission (PAOCC) og P1 milyones nga reward ngadto ni bisan kinsa nga makahatag og impormasyon nga magamit sa pagsubay sa nahimutangan karon ni kanhi police Lt. Col Rafael Dumlao III nga giingong utok sa pagpatay sa South Korean businessman nga si Jee Ick-joo.
Matod ni Criminal Investigation and Detection Group (CIDG) Director PMGen. Nicolas Torre III, aduna nay mga lead nga gisundan sa ilang han-ay aron masayran kung asa karon nagtago-tago ang suspek.
Matod niya nga niabot na sa ilang buhatan ang impormasyon ug subay sa iyang duha ka asawa nga posibleng maoy sinugdanan sa ilang pagsubay aron masuta ang iyang nahimutangan.
Niadtong Domingo lang, mismong si Executive Secretary Lucas Bersamin mimando nga sugdan ang manhunt operations batok kang Dumlao aron masikop sa dili madugay.
Samtang gitataw ni Torre nga wala pay natala nga official departure ang Bureau of Immigration (BI) ubos sa ngan ni Dumlao, apan bisan pa niini, wa nila isalikway ang posibilidad nga nibiya na sa nasod ang kanhi pulis.
Nunot niini, gipasalig sa PNP nga padayon ang ilang pakig-alayon sa International Police Organization (Interpol) alang sa pag-isyu og Red Notice batok kang Dumlao nga magamit sa pag-alerto sa ubang kanasuran aron masikop ang suspek.
Busa, nagbutang na karon og tracker team ang PNP aron mas dali nga mailhan ang nahimutangan ni Dumlao ug tutokan usab ang posibleng kalamboan sa kaso sa umaabot nga mga adlaw. (Bombo Irene Ardiente)
