CEBU CITY- Iduso sa Cebu City Disaster Risk Reduction Management Council (CCDRRMC) ang resolusyon, nga nagtumong sa paghangyo sa konseho sa Dakbayan sa Sugbo sa pagpatiwas ug pagpapadayon og trabaho sa wala mahuman nga taytayan sa Sitio Candarong, Brgy. Pulangbato.
Subay sa panagtigom ni Mayor Raymond Alvin Garcia sa (CCDRRMC), ug mga opisyales sa Brgy.Pulangbato, gahapon adlawa,Huybes, Abril 24, iyahang gikabutyag nga nanghinaot siya nga ma aprobahan ang resolusyon nga gisugyot, aron makasugod na sa procurement process ang City Hall.
Sa kahinomdoman, sa tuig 2012 napagawas ang budget nga 12 milyones sa kanhi Mayor sa Sugbo, aron sa pagtukod niini, ug gisugdan ang pagtrabaho sa taytayan sa pangu sa kontraktor nga SBD Builders sa Septiyembre, 2023.
Apan, wala gihapon kini nagmalampusong nahuman hangtud sa dihang giputol sa kasamtangang Mayor sa Sugbo ang kontrata niini karong tuiga, kini subay sa hangyo usab sa mga opisyales sa Pulangbato.
Samtang, gipasabot usab ang mga opisyales sa Pulangbato nga gihan-ay na ang tanan alang sa pagpahigayon og bidding, apan dli pa kini mapagawas ilabi na nga adunay election ban sa kasamtangan, gawas kung ma consider kini nga exempted sa election ban.
Dugang niana, kinahanglan pa usab kining ipananghid sa City Legal Office (CLO) kung pwede ba kini nga sukaranan og state of emergency aron ma exempted sa election ban, kay sa kasagaran mga emergency lang susama sa mga fire victims nga exempted gayud. Busa, kinahanglan pa kining iklaro sa City Legal Office.
Kung masugdan na ang padayong pagtrabaho sa taytayan, molanat pa og mga unom ka buwan usa kini mahuman.(BOMBO IRENE ARDIENTE)
