Gihatag sa Cebu Provincial Board ang ilang hugot nga suporta sa balaudnon alang sa pagtukod sa Cebu North Economic Zone ug Freeport aron mas mapalambo pa ang ekonomiya ug negosyo sa amihanang bahin sa lalawigan.
Matod ni Cebu Vice Governor Glenn Anthony Soco, ang Sangguniang Panlalawigan padayon nga nagpasar og mga resolusyon ug ordinansa nga nagsilbing instrumento sa paghulma ug pagduso aron mapasar ug mapatuman ang maong proyekto.
Namatikdan sa Bise Gobernador nga pipila sa mga House Bill ang gipasar sa Kongreso ni Representative Benhur Salimbangon, ug sa pagkakaron, aduna nay bag-ong bersyon nga giduso ni Representative Sun Shimura, ug ang mga balaudnon anaa na karon sa mga komite sa Kongreso aron opisyal nga mamugna ang usa ka Special Economic Zone sa amihanan.
Gipasiugda usab sa opisyal ang kamahinungdanon sa pagduso sa balaudnon aron makadani kita og mga pribadong investor nga mamuhunan sa lalawigan.
Nipasalig usab kini nga ang lalawigan magpadayon sa pagpakigtambayayong sa nagkalain-laing sektor aron makab-ot ang paspas nga paglambo sa ekonomiya ug makamugna og mga trabaho alang sa katawhan sa Sugbo.
