CEBU CITY — Nagtusak-tusak sa bala ang kalawasan sa mayor sa Clarin, Misamis Occidental nga si Mayor David Navarro human kini nga gi-ambush sa M. Velez St. Barangay Guadalupe, dakbayan sa Sugbo.
Sa pakighinabi sa Bombo Radyo kang Police Master Sergeant Carlo Balasoto, ang police investigator sa Fuente Police Station, gibutyag niini nga paingun na unta sila sa piskaliya alang sa inquest proceeding sa dihang kalit nga mibabag ang usa ka puti nga van diin sakay ang dili mu menos napulo gunman sa ilahang gisakyan nga patrol car kung diin anaa sa sulod ang mayor.
Matud ni PMSg. Balasoto nga giti-unan ug armas ang drayber sa patrol car, gipahapa silang tanan ug gipagawas sa sakyanan ang mayor ingun man ang tulo ka bodyguards niini.
Giingung pagkagawas sa mayor sa patrol, gipahubo kini sa gisul-ob nga vest ug dayung gitusak-tusak kini sa bala hinungdan sa iyahang hinanali nga kamatayon, samtang samdan ang tulo ka mga bodyguards.
Sa pagkakarun, nagpadayon ang imbestigasyon sa kapulisan kung diin sa inisyal nga report, personal grudge o ang kalambigitan niini sa iligal nga drogas ang motibo sa krimen.
Kahinumdoman nga nahimong kontrobersyal ang mayor sa dihang nangulata ug nangbastos sa duha ka mga masahista sa usa ka massage parlor dinhi sa dakbayan sa Sugbo ingun man nga nagpaila pa kini nga pulis hinungdan nga napriso ug kasohan na unta ug act lasciviousness, physical injury ug usurpation of authority.
Nasayran nga si Mayor Navarro ang nalakip sa narco-list ni Presidente Rodrigo Duterte.
Kaso vs. MisOcc mayor
Gipahibalu ni Police Major Edward Sanchez, ang hepe sa Abellana Police Station, nga kasong act of lasciviousness, physical injuries, ug usurpation of authority ang ipasaka batuk ni Mayor Navarro.
Matud ni PMaj. Sanchez nga nagpaila kini nga sakop sa kapulisan hinungdan nga pasang-atan kini ug kasong usurpation of authority.
Gitataw sa hepe nga wala’y special treatment nga nahitabo ug gani wala kini nila gitugutan sa hangyo nga magpa-hospital arrest.
Nasayran nga naghilak ang mayor human kini nasayod sa mga kaso nga ipasang-at batok kaniya. (With reports by Bombo Eric Amaro/sbr/lq/gn)
