DAANBANTAYAN, CEBU-Gipusil patay ang duha ka lalaki sa Lungsod sa Daanbantayan sa Miyerkules sa gabii Agusto 02, 2023.
Giila ang mga biktima nga sila si Jerome Arriesgado lumulupyo sa lungsod sa Medellin ug si alyas ‘Inting’ nga taga Sitio Malaomon Barangay Tinubdan lungsod sa Daanbantayan.
Gibutyag ni Police Sergeant Jelimar Gilbuena, desk officer sa Daanbantayan Police Station nga ang duha ka biktima gipamusil sa riding in tandem sa Proper Tinubdan sa naasoy nga Lungsod.
Nasayran nga nag-gikan ang mga biktima sa Medellin sakay sa ilang motor sa dihang adunay migukod sa ilang motorsiklo nga adunay sakay nga duha ka tawo og namusil kanila.
Sigun sa naka saksi, naka ikyas pa ang mga biktima gikan sa lungsod sa Medellin ug naka abot pa sa Daanbantayan apan usa kanila ang naigo hinungdan nga nangatumba sila sa karsada.
Sa dihang nangatumba, gibalikan pa sa mga suspek ug gitiwasan sa pag-pusil sa walo ka higayon.
Gidala sa Daanbantayan District Hospital ang mga biktima apan gidiklarar na kini nga dead on arrival.
Nakuha sa police ang walo ka basiyo sa bala sa kalibre 9mm diin gituohang gigamit sa pagpamusil sa mga biktima.
Dugang pa nga nakuha usab ang kalibre .357 gikan sa posisyon ni Jerome ug usa ka pakiti sa gituohang shabu sa posisyon ni alayas ‘Inting’.
