CEBU CITY-Nahisama sa usa ka teleserye ang nahitabong shooting sa may F. Soto St., Brgy. Kamputhaw dakbayan sa Sugbo. Kini human nga na-videohan sa usa ka concern citizen ang panghitabo kung diin gipusil sa usa lalaki nga adunay nindot nga postura ang usa usab ka lalaki kung diin sa unang tan-aw mura gyud og teleserye.
Sa pakighinabi sa Bombo Radyo kang SPO2 Romel Bancog sa Homicide Section sa Cebu City Police Office, giingon niya nga ang biktima nga si Ephream Nuwal , 33 anyos ug usa ka nurse sa usa ka hospital sa Cebu nagmaneho sa iyang kotse sa dihang nabantayan niini nga nagzigzag ang dagan sa sakyanan nga iyang gisundan hinungdan nga iya kini nga gibosenahan.
Giingong mihunong ang maong kotse ug minaog ang suspek nga adunay dala nga 22 caliber pistol ug dili kini makatul-id sa iyang paglakaw. Nakita usab sa video nga susamang nagkalalis ang duha hangtud sa gipusil sa suspek ang biktima ug naigo kini sa paa. Dali usab nga miikyas ang suspek sakay sa iyang Mercedes Benz e550 nga adunay plate number nga UWI-731
Gitoohang hubog ang maong suspek ug karon padayon pang gipangita sa kapulisan sa tabang na usab sa video nga gi-share sa homicide section gikan sa nahisgutang concern citizen. Mi-circulate na karon sa social media ang nahisgutang video ug padayon ang pagpangita sa maong suspek.
Samtang luwas og nakuha na ang duha ka bala nga naka-igo sa paa sa biktima ug padayon pa kining nagpa-alim sa tambalanan.
