Nibalik na sa pagpanakop ug pag-isyu og Temporary Operator’s Permits (TOP) ang pipila ka mga personnel sa Traffic Enforcement Agency of Mandaue (TEAM) human gi-renew sa Land Transportation Office (LTO) ang ilang deputation.
Kini nga lakang nagtugot sa maong mga enforcers nga magpadayon sa pag-abag sa pagpatuman sa mga balaod sa trapiko sa tibuok dakbayan sa Mandaue aron masiguro ang kahapsay sa kadalanan.
Adunay napulo ka mga enforcers ang orihinal nga na-deputize sa LTO-7 sugod niadtong Marso hangtod Disyembre 2025 human sila nakapasar sa tanang gikinahanglang eksaminasyon.
Karong bulana sa Pebrero, pormal nga na-renew ang ilang deputation, hinungdan nga aduna na usab silay legal nga katungod sa pagdakop sa mga malapason sa balaod, ilabi na kadtong naggamit og mga modified o saba kaayo nga tambutso.
Matod pa ni TEAM head Hyll Retuya, ipadayon nila ang hugot nga kampanya batok sa mga modified mufflers tungod sa kadaghan sa reklamo nga ilang nadawat gikan sa publiko, ilabi na panahon sa kagabhion.
Gipahinumdoman sa LTO ang tanan nga ang pag-usab sa tambutso usa ka klaro nga paglapas sa Section 34 sa Republic Act No. 4136, o ang Land Transportation and Traffic Code, uban sa Department Order No. 2010-32.
Bisan pa man niini, giklaro ni Retuya nga ang mga drayber nga ma-isyuhan og TOP sa mga personnel sa TEAM dili makuhaan sa ilang lisensya.
Kini subay sa mando sa Department of Transportation nga temporaryong nag-suspendi sa pagkumpiska sa mga driver’s license.
Apan, ang mga motorista nga makadawat og TOP gikinahanglan gihapon nga mobayad sa ilang mga multa o penalty sulod sa 15 ka working days aron dili mosamot ang ilang tulubagon.
