CEBU – Anaa na sa kataposang bahin ang kapulisan sa Central Visayas sa ilang pagpangandam sa seguridad alang sa umaabot nga Kalag-Kalag 2022.
Kini ang gibutyag ni Police Brigadier General Roderick Augustus Alba, director sa Police Regional Office sa Central Visayas (PRO-7), nga ilang gipaabot nga modagsa ang mga tawo sa mga sementeryo, ilabi na nga gipaluagan na ang health restrictions.
Nanawagan si Alba sa publiko nga sundon gihapon ang minimum public health standard, partikular ang pagsul-ob og face mask.
Matud ni Alba nga ang tanan nilang mga lakang sa seguridad subay sa direktiba gikan sa Inter-Agency Task Force for the Management of Emerging Infectious Diseases ug sa tagsa-tagsa ka Local Government Units sa rehiyon.
Gipahinumdoman pa ni Alba ang publiko nga dili magdala og mga bladed nga armas, ug ilimnong makahubog sulod sa mga sementeryo tungod kay makumpiska kini.
Matud pa ni Alba nga iya nang gimandoan ang iyang mga sakop sa pagmonitor usab sa mga entry ug exit point sa sea ug air terminals alang sa Kalag-Kalag 2022.
