Gisuportahan sa League of Cities of the Philippines ang direktiba ni Presidente Ferdinand “Bongbong” Marcos Jr. ngadto sa mga ahensya sa gobyerno nga mangayo una og pagtugot sa mga lokal nga kagamhanan sa dili pa magsugod ang mga bag-ong proyekto.
Matod ni League of Cities of the Philippines (LCP) national president ug San Juan City Mayor Francis Zamora, base sa mga mayor nga iyang nahinabi, ilang gikompirmar nga wala sila gipahibawo bahin sa mga proyekto nga gihimo sa ilang mga lugar.
Busa, matod niya dako nga tabang ang direktiba sa Presidente aron malikayan kini nga mahitabo.
Ang liga mihimo sa maong pamahayag nunot sa pagsaway sa administrasyong Marcos Jr. sa gikatahong ghost ug substandard nga flood control projects.
Duna nay duha ka pamahayag ang giluwatan sa liga, ang una nagpadayag sa hingpit nga suporta sa kamanduan sa Presidente alang sa imbestigasyon sa mga palpak ug ghost projects ug ang ikaduha, ang ilang suporta sa direktiba nga nagkinahanglan sa mga ahensya sama sa Department of Public Works and Highways (DPWH) nga makakuha una og pagtugot gikan sa mga lokal nga kagamhanan.
Nagtuo si Zamora nga ang paglakip sa mga LGU sa proseso sa pagplano moresulta sa mas maayong mga proyekto.
