Wala nawad-an sa paglaum ang mga rescuers nga makit-an ang daghang mga tawo nga nawala o missing sa giisip nga labing grabe nga pagbaha nga miigo sa Spain sa mga henerasyon.
Hangtod karon, gipangita pa sa mga emergency team ang posibleng mga survivor sa maong kalamidad.
Liboan ka mga boluntaryo ang karon nagtabang sa militar sa Espanya ug mga serbisyo sa emerhensya sa rescue ug clean-up operation.
Matod ni Valencia regional president Carlos Mazon, dugang tropa ang ipakatap.
Ang Punong Ministro sa Espanya nga si Pedro Sanchez misaad nga buhaton sa gobyerno ang tanan aron matabangan ang mga naapektuhan sa katalagman.
Sa pagkakaron, kapin sa 200 ka mga tawo ang kompirmadong namatay sa kaylap nga pagbaha, kadaghanan niini natala sa rehiyon sa Valencia.
Ang kaylap nga pagbaha miguba usab sa mga taytayan ug mitabon sa mga lungsod sa lapok ug miresulta sa pagkawala sa kuryente, tubig ug mga suplay sa pagkaon sa mga apektadong komunidad.
Sumala sa pipila ka mga residente, daghang mga kinabuhi ang maluwas kung ang lokal nga awtoridad nagpasidaan dayon bahin sa peligro sa baha.
