CEBU CITY-Ihunong na sa mga technical divers ang pagsawm sa dagat sa Olanggo ug Caubian Island aron pangitaun ang lawas ni Bien Unido Mayor Gisela Boniel, nga giingong gipatay ug gilabay sa dagat sa mister niini nga si Board member Nino Rhey Boniel.
Matud sa head sa technical divers nag si Police Chief Inspector Jacinto Mandal Jr, nga gi- rekomenda niini kay Police Regional Office 7 Director Police Chief Supt. Noli Talino nga ipahunong na niini ng pagpangita mahitungod nga hapit na kini maabot sa boundary sa Camotes Island ug Bohol apan pakyas gihapon kini nga makit-an ang lawas sa maong mayor.
Matud usab ni Mandal nga posibleng anaa sa mas ilawum nga bahin sa dagat naanod ang lawas sa mayor mahitungod nga sulod sa 14 ka adlaw nga pagsawm wa gihapon kini nila makit-i. Dugang pa niini nga dili na makayanan sa mga technical divers ug piligro na usab ang lagpas 200 feet nga gilawmun sa dagat.
Sa niaging adlaw, usa ka diver nga miyembro sa retrieval team ang gidali sa tambalanan mahitungod kay nahutdan kini ug oxygen kasamtangan sa pagsisid niini. Wala usab nadetect ang side scan sonar nga gigamit sa Navy maoy hinungdan nga wala nalang usab gigamit ang underwater robots.
Matud ni Police Regional Office 7 Director Police Chief Supt. Noli Talino , nga kung di na makaya sa mga divers kay ipahunong na nila ang maong retrieval operation apan dili nila i-atras ang kaso bisan pa na wala makit-i ang lawas ni Mayor Boniel.
Nasayran nga pasado alas 3:30 sa hapon gihunong sa search and retrieval team ang operasyon niini. Sulod sa 14 ka adlaw, habol ug pipila lang ka mga hibla sa buhok ang nakuha sa mga grupo.
Gipa-abot pa sa pagkakaron ang resulta sa gihimong eksaminasyon sa PNP Crime Labotarory para masigurado nga kay Mayor Gisela ba ang pipila ka mga hibla sa buhok ug ang lama sa dugo nga nahabilin sa narecover nga habol.
