CEBU PROVINCE-Nisaka ang kaso sa pagpanglugos sulod sa panimalay, usa ka tuig human niigo ang pandemya sa COVID-19, kini ang gitino ni Police Lieutenant Colonel Randy Caballes, ang bag-ong gitudlo nga Deputy Provincial Director for Operations sa Cebu Provincial Police Office (CPPO).
Kung kahinumduman nga sa wala pa madestino sa CPPO si Caballes nadestino sa Talisay City, Cebu, isip hepe sa kapulisan.
Sa iyang pag-refer sa ilang datus sa Talisay City, tali sa 2021 ug 2022, ang dakbayan maoy nag-una sa mga LGU nga adunay daghang kaso sa pagpanglugos sa tibuok rehiyon.
Sa iyang pagtuon sa datus uban sa ilang imbestigador sa Women and Children Protection Desk, ilang nasuta nga kadaghanan sa mga suspek mga amahan samtang ang mga biktima ilang mga anak nga nagpuyo sa usa ka lawak.
Giklaro sa opisyal nga ang sexual assault o rape wala magdepende sa sinina o pag-inom sa alkohol sa usa ka tawo, bisan unsa pa ang ilang gender.
Hinuon, ang pag-apil sa mga non-consensual nga mga buhat nagpakita sa sayop nga binuhatan sa usa ka indibidwal ug gikonsiderar nga usa ka kriminal nga sala, nga mapasakaan ug kaso ug mahimong mosangpot sa pagkabilanggo.
Nagtuo usab si Caballes nga dili igsapayan ang gisul-ob sa mga tawo.
Atol sa pandemya, gibutyag ni Caballes nga kadaghanan sa mga suspek ug biktima, apil ang mga amahan ug mga anak, nalambigit sa mga kaso sa pagpanglugos sa Probinsiya sa Sugbo.
Dugang pa, nga ang mga biktima, kasagaran mga bata ug babaye, gikan sa 7 hangtod 19 anyos.
