Nagduda ug gisaway ni Senador Imee Marcos ang ikalima nga State of the Nation Address (SONA) sa iyang igsoon nga si Presidente Ferdinand Marcos Jr., ilabi na ang iyang pamahayag nga ang Ombudsman mopasaka og kaso batok sa ilang ig-agaw nga si kanhi House Speaker Martin Romualdez.
Sa usa ka pamahayag, gitawag sa senador ang pamahayag sa Presidente nga usa ka “pambubudol.”
Gipangutana usab sa senador kung nganong ang mga opisyal nga kritiko sa administrasyon dali ra kaayong mopasaka og kaso, samtang ang aksyon hinay kaayo batok sa mga kaalyado niini.
Dugang nga giinsistir sa igsoon sa Presidente, dili lang si Romualdez ang angay manubag tungod kay dili lang siya ang nag-inusara nga nalambigit sa usa sa mga lapad nga korapsyon sa nasud.
Mabantayan nga gahapong adlawa, atol sa SONA ni PBBM, wala mitambong si Imee, uban sa ubang miyembro sa minorya sa Senado.
Kahindomdoman nga si Presidente Marcos, nagpahibalo nga ang kanhi Speaker Martin Romualdez sa dili madugay pasakaan na og kaso nga may kalabotan sa giingong korapsyon sa mga proyekto sa pagkontrol sa baha.
Sumala ni Marcos, gibasi sa Ombudsman ang pagpasaka og mga kaso anaa na sa katapusang mga yugto human sa usa ka halapad ug walay gidapigan nga imbestigasyon.
Gipasiugda sa Presidente nga kini nga desisyon sakit alang kaniya, apan iyang giinsistir nga kinahanglan kini buhaton.
