CEBU CITY-Gihimakak ni outgoing Cebu 4th District Representative Benhur Salimbangon ang alegasyon mahitungod sa giingong vote-buying sa House of Representatives.
Kini ang nahimong pamahayag sa nahisgutang kongresista subay na sa init nga pakigtigi sa pagka-House Speaker sa umaabot nga 18th Congress.
Matud ni Salimbangon nga kadaghanan sa iyang mga kaubanan sa Kongreso mipakita og interes sa pagka-lider sa Kamara.
Gani, mipasiaw ug nagkomedya pa si Salimbangon atol sa usa ka party ni Rep. Rudy Fariñas nga mas maayong i-raffle na lang ang pagpili sa bag-ong House Speaker
Una na nga miingon si Davao Del Norte Rep. Pantaleon Alvarez nga nakabayti siya ug mga huhungihong mahitungod sa giingong pinalitay og boto nga maoy gihimo niining baruganan.
Nabatian lang matud pa niini gikan sa iyang mga “higala” sa Kongreso ang giingong vote buying diin moabot sa P1-million ang offer aron botaran ang usa ka kandidato sa pagka-House Speaker.(FDP/GN)
