CEBU CITY – Posibling adunay pagkuwang ang mga opisyal sa Iloilo City sa dihang ang lugar ang gikuso-kuso sa bagyong Ursula.
Kini ang pamahayag ni Cebu City Councilor Dave Tumulak subay sa nagkasaka nga ihap sa mga namatay sa Iloilo gumikan sa maong bagyo.
Gibutyag ni Tumulak nga numero uno gayud nga buhaton sa disaster team ingon man sa mga opisyal sa LGU ug mga barangay ang pagpahigayon ug preemptive evacuation.
Matud pa nga 24 oras sa wala pa ang bagyo hayan nakahan-ay na ang tanan.
Lantaw sa konsehal nga ulahi na sa dihang nagpahigayon ug evacuation sa dakbayan sa Iloilo hinungdan nga adunay daghang patay.
Giingong kuwang gayud ang preparasyon sa LGU.
Gawas sa LGU, angayan nga adunay aksyon ang barangay kinsang numero uno nga nasayod sa ilahang ‘terrain’ diin giingong posibling adunay negligence usab sa ilahang habig.
Subay niini, sugyot ni Tumulak nga magkat-on ang mga LGU ug barangay officials ug ‘weather forecasting’ arun nga masayod sa pag-calculate sa direksyon sa bagyo.
Apan giklaro sa konsehal nga basihan sa gihapon ang forecast sa PAGASA.
Gipasabot niini nga isip mga opisyal ug adunay responsibilidad sa ilahang katawhan hayan mas maayo nga masayod gayud sa pag-calculate sa lihok sa bagyo arun nga mas mapangandaman ug malikayan nga adunay mangamatay.
