CEBU – Dili malikayan ang pagsaka sa presyo sa mga pan gumikan na usab sa ka mahal sa mga raw materials.
Gibutyag ni Jojo Tiongko, ang founder sa Cebu United Bakeries, nga dili lang gumikan sa pagsaka sa presyo sa lana hinungdan nga tuyo nila nga mupasaka sa presyo sa mga pan, inay ang mga ‘ingredients’ sa paghimo niini.
Matud pa, gikan sa P1,750 nga sako sa asukar sa nakalabay nga tuig, nahimo na kining P4,150, butang nga misaka kini sa 137% matag sako gikan sa buwan sa Setyembre sa nakalabay nga tuig hangtud ning kasamtangan.
Gawas pa sa asukar kay misaka usab ang presyo sa harina, gikan sa P650 kay mikabat na kini sa P1,100 matag sako.
Subay niini, gipahibalo ni Tiongko nga aduna na’y mga bakeshop ang naglisod ilabi na niadtong mga gagmay nga bakery.
Kung dili sila mupasaka ug presyo sa ilahang mga pan, giingong posibli nga manirado na ang pipila ka mga bakery.
Nanawagan kini sa mga kunsomidor nga taasan ang pagsabot kung mupasaka sila sa presyo sa mga pan ug padayon nga suportahan ang mga local bakeries.
