METRO MANILA-Nabalaka ang Commission on Population and Development (CPD) sa balikbalik nga pagmabdos sa mga batan-ong Pinoy, ug sa padayong pagsaka sa ilang gidaghanon.
Matod sa hepe sa CPD Knowledge Management and Communications Division nga si Mylin Mirasol Quiray, ang ahensya nakatala na og 25,358 ka repeat pregnancy nga naglambigit sa mga teenager.
Ang mga babaye nga namabdos nag-edad og diyes (10) hangtod 19.
Gikabalak-an, matod niya, nga mamabdos sila pag-usab, bisan sa wala pa sila mag-edad og 20.
Niining kapin sa 25,000, ang datos sa CPD nagpakita nga 23,022 ka inahan nga nag-edad ug 15 ngadto sa 19 ang namabdos pag-usab pipila lang ka tuig ang gintang.
Niini nga grupo sa edad, 2,169 ang nagmabdos sa ikatulong higayon; 125 Nagmabdos sa ikaupat nga higayon, ug ang duha namabdos sa lima ka higayon.
Sa mga bata nga wala pay 15 anyos, adunay 40 ka mga tin-edyer nga babaye nga namabdos sa makaduha.
Matod sa representante sa nasud sa UN Population Fund Philippines (UNFPA) nga si Leila Saiji Joudane, gikinahanglan ang usa ka balaod nga nagtubag sa sayo nga pagmabdos o teenage pregnancy aron mahatagan og komprehensibo nga aksyon ug tukma nga framework nga sundon sa pagsulbad sa problema.
