CEBU CITY – Gibarugan ni Senate President Vicente ‘Tito’ Sotto III nga angayan nga i-renew ang prangkisa sa ABS-CBN.
Kini ang pamahayag sa senador subay sa pagpasaka ug quo warranto petition ni Solicitor General Jose Calida batok sa nahisgutang network.
Gibutyag ni Senator Sotto sa dihang eksklusibo nga pakighinabi sa Bombo Radyo Cebu, nga walay kalabotan ang prangkisa nga ‘pending’ pa sa Kongreso, sa gipasaka nga petition ni Calida.
Matud pa nga na ‘overstretched’ na ang isyu nga giingong gisapawan ni Calida ang gahum sa mga magbabalaud.
Sa pagkakarun, giingong wala pa may kalabotan ang senado sa prangkisa sa network gawas na lang ug aksyonan kini sa House of Representatives ug ipasa kanila.
Gihimug-atan ni Sotto nga gitun-an sa mga senador ang tanang mga dokumento nga ipasa kanila ug giingong gustuhon man ni Presidente Rodrigo Duterte o dili ang ilahang mahimong desisyon, magpabilin nga independente ang senado.
