CEBU CITY – Nagpabilin ang baruganan ni Cebu City Mayor Edgardo Labella nga musunod sa balaud.
Kini subay sa kontrobersyal nga clearing operation kung diin apektado ang mayorya sa mga sidewalk vendors sa dakbayan sa Sugbo.
Gipadayag ni Atty. Rey Gealon, ang City legal officer, nga igo lang nagsunod si Mayor Labella sa kamanduan ni Presidente Rodrigo Duterte ingon man sa DILG sa paghawan sa mga kadalanan.
Matud pa nga dili man usab mawakli ang kamatuoran nga dili gayud mahimong baligya-an ang mga sidewalk.
Apan gitataw ni Atty. Gealon nga dili usab mutugot ang mayor nga kuha-an na lang gayud sa panginabuhi-an ang mga sidewalk vendors hinungdan nga nangita gayud kini ug mga pamaagi nga makabalik sa naandan nga pwesto sa dalan Colon ang mga vendors.
Samtang, gipahibalo ni Atty. Gealon nga nagpadayon pa ang ilahang pagkuha ug mga dokumento arun sa hingpit nga pagpasaka ug complaint batok sa usa ka fast food chain nga giingong misabak na sa sidewalk, una kini nga pahigayonan ug demolisyon.
Nagkanayon kini nga gikinahanglan pa ang technical analysis ingon man rekomendasyon gikan sa Office of the Building Official (OBO) una ang demolisyon.
