Temporaryo nga gipahunong ang pagbomba sa nahabilin nga kargamento sa lana sa nalunod nga MT Terranova aron mahatagan og kahigayonan nga madiskarga ang mga nakuhang oily waste sa Orion Dockyard sa probinsya sa Bataan.
Mao kini ang gikompirmar sa Philippine Coast Guard diin kung mahuman na ang pagbalhin sa nakolektang lana, dad-on kini sa treatment facility arun sa saktong disposal.
Ang nakakontrata nga salvor nga Harbour Star sa PH nakakolekta na og kapin sa 903,000 ka litro nga oily waste gikan sa motor tanker gikan sa Agosto 19 hangtod 29.
Sa laing bahin, ang BRP Sindangan nagpahigayon usab ug aerial surveillance sa ground zero ug ang mga personahe niini mipahigayon og monitoring sa kasikbit nga baybayon alang sa posibleng mga ilhanan sa oil sheen apan walay naobserbahan atol sa samang operasyon.
Samtang, sa kaso sa nabalitok nga MTKR Jason Bradley, nagpadayon ang re-sealing ug patching operation sa manhole ug air vents sa barko.
Sa dihang gironda sa Oil Response Team ang kabaybayonan, walay oil sheen nga nakita.
