Dakog epekto sa mga mananagat sa tibuok nasud ang padayung pagtaas sa presyo sa lana, gumikan sa kagubot nga namugna sa Middle East.
Matud ni Fernando Hicap ang National Chairman sa Pamalakaya, nga dako kinig epekto sa nasud hilabi na sa mga mananagat ang pagtaas sa presyo sa lana gumikan kay sa wala pa ang kagubot sa Middle East, 80 porsyento na sa pangita sa mga mananagat ang gigahin sa pagpalit og gasolina.
Sigon ni Hicap, nga gawas sa pagtaas sa presyo sa lana, lakip nga nakabalda niini ang ka-limitado nalang sa pagpanagat gumikan kay ang mga pangisdaan kaniadto gihimo nang reclamation area, og pun-an pa sa mga ordinansa sa matag local government Units sa pagdili sa mga mananagat nga mangisda sa dili residente sa maong lugar.
Dugang usab niini nga makatabang gayud ang fuel subsidy nga ipang-apud-apod sa buhatan sa Department of Agriculture nga mokabat sa 100 million nga budget alang sa mga mananagat og mag-uuma, apan giklaro nga dili kini makatabang sa kinatibuk-an gumikan kay kuwangon ra kini sa nanginahanglan og tabang nga moabot sa 2.7 million apan 14,947 lamang maabot nga benepisyariyo niini
Gihimug-atan ni Hicap, nga ang maong mga lakang usa lang ka band-aid solution, og gidugang nga og seryuso ang kagamhanan sa pagsulbad sa maong problema kinahanglang papason ang “excise tax” og “value added tax” aron nga makuhaan ang kamahal sa mga produkto hilabi na sa presyo sa lana og krudo.
Gibutyag usab niini nga direktang apektado gayud ang mga mananagat sa nahitabo dili lang gumikan sa pagtaas sa presyo sa lana a pan lakip na ang pagkabalda sa ilang panagat sa tungod sa mga proyekto nga gitukod sa mga coastal areas.
Samtang, nanawagan usab ang grupo sa Pamalakaya nga ibasura na ang koleksyon sa excise tax og value added tax sa lana lakip na usab ang pag-nationalize sa produktong petrolyo sa nasud.
