CEBU CITY – Gilantaw sa kapulisan ang posibilidad nga adunay ‘inside job’ sa nahitabu nga pagtulis sa head guard sa Sarsalejo Security Agency sa Barangay Tisa, dakbayan sa Sugbo.
Gi-asuy ni Police Major Henrix Bancoleta, hepe sa Labangon Police Station, nga posibling anaa lang sulud sa nahisgutang security agency ang nakigkunsabo sa tulisan ug kanhi pulis nga si Police Corporal Jobie Antipolo.
Matud ni PMaj Bancoleta nga gi-atul man ang maong pagpanulis nga naghatud ug sweldo ang head guard nga si Edwin Velos ingun man nga adunay kasayuran ang mga tulisan nga anaa sa U-box sa motor gibutang ang kwarta hayan posibling adunay kasayuran ang mga suspek sa dagan sa biktima, ingun man ang pamaagi sa paghatag ug sweldo sa mga gwardya.
Basi usab sa imbestigasyon, giingung kaniadtu ang mga gwardya mismo ang paadtu-un sa ilahang opisina arun nga magkuha sa sweldo apan gumikan kay adunay pipila ang anaa sa layu na assign hinungdan nga nasabutan nga ihatud na lang sa ilahang head guard ang sweldo.
Samtang, plano karun sa Sarsalejo Security Agency nga usbun ang pamaagi sa ilahang paghatag ug sweldo sa ilahang mga gwardya arun nga malikay na ang susamang panghitabu kagahapung adlawa.
Gibutyag ni Jonefer Sarsalejo, tag-iya sa Sarsalejo Security Agency, nga subli na usab silang magplano ug kausaban sa ilahang pamaagi kung diin wala usab niini gisalikway nga adunay inside job nga nahitabu.
Gihulagway usab ni Sarsalejo nga iyaha na gayud nga sinaligan si Velos ug kapin duha katuig na kini nga nag-serbisyo sa ilahang kompanya.
