Usa ka 53 anyos nga lalaking trabahante ang nakit-ang patay pag-abot sa Sambon Rural Health Unit human aksidente siyang na-atrasan sa usa ka cement mixer truck samtang gitabangan niya kini sa pagmaniobra sa Brgy. Cambigong, Samboan City, Cebu pasado alas 12:30 sa udto niadtong Hulyo 28, 2026.
Ang biktima giila nga si Reymund Alberca Lanticse, 53 anyos, usa ka truck helper, ug residente sa Sitio Dubdub, Brgy. Bogo, Argao Cebu.
Samtang, ang drayber sa Sinotruk Transit Cement Mixer Truck mao si Jeffrey Cadungog Famulagan, 39 anyos, residente usab sa Sitio Dubdub, Brgy Bogo, Argao, Cebu.
Sa inisyal nga imbestigasyon sa Samboan Municipal Police Station, nasayran nga gikan pa sa Argao ug padulong unta motungas sa Brgy. Canyorong ang maong cement mixer truck nga gimaneho ni Famulagan inubanan ni Lanticse aron gamiton sa usa ka road concreting project sa diha nga napalyar ang makina niini og nawad-an na og kontrol ang driver.
Dali nga nigawas ang biktima sa passenger seat ug misaka sa hagdanan sa trak aron maabot ang mga alambre sa kuryente aron dili masangit ang trak sa dihang nabanggaan ang biktima sa nag-atras nga trak.
Dali nga nanawag ang mga residente sa lugar sa mga personahe sa Rural Health Unit diin ilang nakit-an ang biktima nga walay panimuot ug walay pulso, ug gidala kini sa Samboan Rural Health Unit.
Ang drayber sa trak nga si Famulagan, anaa karon sa kustodiya sa Samboan PNP diin naghulat siya sa disposisyon sa posibleng kaso nga Reckless Imprudence resulting in Homicide and Damage to Property.| By Bombo Rexmond Omega
