CEBU CITY-Gitak-opan ang Palarong Pambansa 2024 pinaagi sa usa ka mabulokon ug napuno sa kasadya human nga nagkahiusa ang Cebu ug gipakita ang kaanindot sa kultura ug talento sa matag Sugboanon.
Ingon man nga uban sa mitak-op sa maong kalihokan si outgoing DepEd Secretary ug Vice President Sara Duterte-Carpio sa Cebu City Sports Center gahapon, Hulyo 16, 2024.
Kung diin nagpaabot si VP Sara og dakong pasalamat sa tanang local government units, mga buhatan sa gobyerno ug private sector partners sa suporta nga gihatag nila sa
mga kalihukan sa Department of Education nga gipahigayon sa dakbayan sa Sugbo, ilabi na ang Palarong Pambansa 2024.
Gitumbok niini nga dalhon ang tagsa-tagsa ka komunidad ang garbo sa usa ka Cebuano, kana gumikan nailhan ang mga Cebuano sa ilang garbo sa kultura, pinulongan, talento, pagtuo, ug paghigugma sa ilang pamilya.
Sa pikas bahin, dungan sa pagtak-op sa Palaro 2024 ang pag-anunsyo sa 2025 Palarong Pambansa sa Ilocos Norte ug ang 2026 Palarong Pambansa nga ipahigayon sa Agusan del Sur human kini makadaog sa bidding.
Sa pagdawat ni Ilocos Norte Governor Matthew Marcos Manotoc sa hagit nga mo-host sunod Palarong Pambansa, mipasalig kini nga andam ang ilang lungsod sa pag-abot sa mga delegado ug hatagan og mainiton nga pagtimbaya.
Ingon man nga giangkon niini nga lisod i-match ang kasadya sa mga Sugboanon apan, mipasalig kini nga buhaton ang tanan alang mahatag ang kalidad ug mapalipay ang mga mosalmot ug mobisita sa ilang dapit.
Subay niini, atol sa pakighinabi sa Bombo Radyo Cebu kang Dr. Salustiano Jimenez, nagpasalamat kini nga nagmalampuson ang pag-host sa palarong Pambansa sa Cebu City pinaagi sa pag-abag sa mga kapulisan ug sa tanang local government unit ug ingon man sa Department of Education Central Visayas hilabi na sa kadagkoan sa DepEd Cebu.
