CEBU CITY-Gisugat og mainit nga pagbati sa kagamhanang dakbayan sa Sugbo ug sa mga organizers sa Palarong Pambansa 2024 ang mga delegado sa torneyo pina-agi sa “Arrival and Flag Hoisting Ceremony” sa Plaza sa Katawhan, habig sa Cebu City Hall kagahapong adlawa sa Dominggo Hulyo 7, 2024.
Gitambungan kini sa mga opisyales sa 19-ka mga rehiyon ug partisipante sa torneyo nga giabi-abihan nilang Cebu City Acting Mayor Raymond Alvin Garcia, Cebu City Acting Vice-Mayor Donaldo “Dondon” Hontiveros, ug mga konsehales sa kagamhanang dakbayan sa Sugbo.
Gipahugyawan kini sa mga maindak nga mga performances ug ingon man sa seremonyas sa paghatag og “key of the City of Cebu” sa matag pangulo sa mga partisipanteng delegasyon.
Mihatag pud sa ilang maanindot nga mga regalo ang mga nagkadaiyang rehiyon sa ilang mga tanyag nga produkto sama sa banig, instrument, ug uban pa.
Gitaos ang maong kalihukan sa “Hoisting of the Delegation flags” kay gipasiugdahan sa mga kapulisan sa Cebu City Police Office ng agipanguluhan ni Police Colonel Ireneo Dalogdog ug sa Cebu Provincial Police Office nga gipanguluhan ni Police Brigadier General Anthony Aberin.
Matod ni Acting Vice-Mayor Hontiveros, hinaut nga mopatigbabaw ang panaghigalaay ug sportsmanship sa Palaro ug abiabihon sa mga Sugbuanon ang ilang pag-abot sa dakbayan.
