CEBU CITY-Gipaabot si Bise Presidente ug outgoing Department of Education (DepEd) Secretary Sara Duterte nga mangulo sa closing ceremonies sa Palarong Pambansa 2024 sa Cebu City Sports Center karong hapon Hulyo 16, 2024.
Kini human nga wala mitunga ang bise-presidente sa opening ceremony ug ang mitambong mismo si Presidente Ferdinand Marcos, Jr.
Samtang walay direktang kompirmasyon nga moabot si Sara, ang security ug protocol team ni Duterte pipila na ka adlaw nga nagpahigayon og inspeksyon sa sports center nga nakitang timailhan nga motambong siya sa maong kalihukan.
Lakip sa gipaabot nga motambong mao sila si Senador Imee Marcos ug iyang anak nga si Ilocos Norte Governor Matthew Manotoc.
Nasayran nga ang Ilocos Norte maoy host sa 2025 Palarong Pambansa, partikular ang Laoag City, hinungdan nga ania na sa Sugbo si Manotoc sukad kagahapon, Hulyo 15, aron pag-obserbar sa sports center, ubang playing venues, ug billeting areas.
Sa opisyal nga pagtak-op sa Palarong Pambansa karong hapon, saulogon sa kagamhanang probinsiyal ang “Pasigarbo sa Sugbo” ug ang innovative show of lights nga mopasiugda sa maong kalihukan.
Kining Pasigarbo mopakita og kapin sa 20 ka mga festival aron ipakita ang gipasigarbo sa Sugbo.
Kung ugaling Motambong si VP Sara, mao kini ang labing dako nga kalihukan sa DepEd nga iyang matambongan sa dili pa siya monaug dayon sa katungdanan isip secretary sa ahensya tungod kay ang iyang resignation epektibo karung Hulyo 19 ug gitakdang hulipan siya ni Senador Sonny Angara.
