Gi-anunsiyo na sa Malakanyang ang duha ka miyembro nga mahimong parte sa Independent Commission for Infrastructure (ICI) nga mag-iimbestiga sa katiwalian sa flood control projects.
Usa na niini si DPWH Secretary Rogelio “Babes” Singson, kinsa maoy kalihim sa ahensya sa panahon ni kanhi Presidente Noynoy Aquino.
Gipangulohan ni Singson ang reporma sa ahensya, lakip ang pagpatuman sa sistema batok sa mga ghost projects ug pagsiguro nga magamit sa hustong paagi ang pundo sa publiko.
Niapil usab sa Independent Commission isip miyembro mao si Rosanna Fajardo, usa ka lisensyado nga Certified Public Accountant sa nasud nga mao karon ang managing partner sa SGV & Company.
Si Fajardo adunay kapin sa tulo ka dekada nga kasinatian sa auditing, internal controls, ug risk management, ug matod sa Palasyo, ang ilang technical insights, partikular sa pagmonitor sa public funds, makatabang sa pag-ila kung asa nahitabo ang kurapsyon.
Sa laing dakong kalamboan, gipahibalo usab sa Palasyo ang ngalan ni Baguio City Mayor Benjamin Magalong, kinsa nagsilbi nga Special Advisor sa ICI.
