Walay angay nga ikasagmuyo sa desisyon sa House of Representatives nga palig-onon ang pagbasura sa impeachment complaint batok kang Presidente Ferdinand “Bongbong” Marcos Jr.
Kini ang gipasiugda sa Palasyo sa Malacañang.
Sumala ni Palace Press Officer Undersecretary Claire Castro, klaro ang resulta sa boto sa House, diin 284 ka mga magbabalaod ang mibotar pabor sa pagbasura sa reklamo, kon itandi sa walo nga misupak niini.
Nangutana si Castro kinsa ang nasagmuyo? Sa iyang nahibaloan, walo lang ang mibotar batok niini.
Gipasiugda sa opisyal sa Palasyo nga ang mga reklamo napakyas tungod sa kakulang sa substansiya ug ang impeachment dili angay gamiton isip usa ka “fishing expedition.”
Gipasiugda ni Castro nga dili lamang ang kadaghanan sa mga miyembro sa House ang nag-ingon nga ang mga pasangil walay basehan, apan ang pipila ka mga eksperto sa balaod ug mga konstitusyonalista nag-ingon nga ang reklamo nga gisang-at batok sa Presidente walay lig-on nga basehan.
Ang mensahe ni Castro sa mga nasagmuyo mao ang “pasayloa lang” kay migawas na ang kamatuoran.
Hilabi na nga giaprobahan na sa House of Representatives ang rekomendasyon sa Committee on Justice nga ibasura ang mga reklamo sa impeachment tungod sa kakulang sa substansiya.
