Moapil ang Palestine sa Miss Universe pageant diin ang modelo nga nakabasi sa Dubai nga si Nadeen Ayoub nga maoy nagrepresentar sa iyang estado sa Miss Universe 2025.
Mao kini ang unang higayon sulod sa 74 ka tuig nga mosalmot ang nasud.
Matud pa ni Ayoub sa iyang Instagram nga iyang gikonsiderar nga dakong responsibilidad ang iyang papel isip representante sa Palestine.
Tumong niini nga gamiton ang iyang plataporma sa pagpahayag sa mga istorya ug mga tingog sa mga kababayen-an ug mga bata sa iyang nasud.
Sa samang higayon, gilusad niya ang Sayidat Falasteen nga proyekto, nga magpasiugda sa kanunay nga wala matagad nga mga istorya sa mga babaye sa Palestine.
Si Ayoub niapil kaniadto sa Miss Earth 2022, diin siya gikoronahan nga Miss Earth – Water. Gawas sa pageantry, usa siya ka fitness coach ug founder sa Olive Green Academy, usa ka kompanya nga nagtutok sa sustainability ug artificial intelligence.
Ang Miss Universe 2025 ipahigayon karong Nobyembre 21 sa Thailand. Samtang ang beteranong kandidato nga si Ahtisa Manalo maoy magsilbing representante sa Pilipinas.
