CEBU CITY – Andam na ang Sugbo alang sa pagpahigayon sa National Youth Day (NYD) 2019 nga pagasugdan karong adlawa, Abril 23, hangtud sa adlaw nga Dominggo, Abril 28, matud ni Cebu Archbishop Jose Palma.
Sigon ni Palma nga ila na kining gipangandaman sukad pa sa miaging tuig tungod kay dakong importansya ilabina sa karon ang seguridad.
Kinahanglan nga hugot ang seguridad para mamahimong malampusong ang kining maong okasyon.
Gipaubos usab ang kinatibuk-ang probinsya sa Sugbo sa red alert subay na pagpahigayon sa NYD 2019 diin pagatambungan kini sa 12,000 ka mga pilgrims gikan sa nagkalain-laing bahin sa Pilipinas.
Kahinumduman nga personal nga gisuta ni Police Regional Office – VII Director Brigadier Gen. Debold Sinas ang deployment sa kapulisan lakip na ang ruta sa mga kalihukan sa NYD 2019.
Gani, gihangop ni Palma ang mga concern sa kadaghana ug nanghinaot usab sila og kalinaw subay na usab sa mga nagkadaiyang aktibidad nga mahitabo.
Nanghinaot usab si Palma nga sa kinatibuk-an mamahimong mabungahon ang maong religious event diin pinasubay kini sa pagselebrar sa “Year of the Youth.”
Angayan matud pa nga ipasulabi ang pakighigalaay ug paginigsoonay ug magpalipayon lang ang tanan.
Dugang pa niini, mi-awhag si Palma sa tanan nga mukooperar ilabina sa pagreport sa mga kadudahang lihok para sa kaayohan sa tana nga musalmot sa event ug dili usab wagtangon ang pagsalig sa Diyos.
Samtang andam usab ang City Traffic Operations Management (CITOM) sa Sugbo para sa pag-abli sa National Youth Day.
Mipahibalo si CITOM head Francisco Ouano nga adunay 90 ngadto sa 140 ka mga traffic personel ang magmando sa trapiko sa dakbayan.
Sirad-an usab ang dalan sa Osmeña Blvd. paingon na sa Sto. Niño para sa ipahigayon nga parade. (FDP/GN)
