CEBU – Dobleng kasakit ang nahiaguman sa usa ka babaye human gipaubos sa duha ka operasyon dihang napalpak ang pag-ibot sa iyang “wisdom tooth.”
Sa usa ka taho, giingong nanghubag ug aduna nay nana sa liog ang babaye nga gitago sa pangalang “Rhian”, dihang napakyas ang dentista nga iyahang gipaibot sa iyahang wisdom tooth sa San Juan.
Tulo ka adlaw nga wala makakaon si Rhian tungod sa nahitabo sa iyang liog nga nihubag ug nisakit usab ang iyang tutunlan.
Nasuta sa x-ray nga ang gituohang wisdom tooth nga naibot sa dentista , mas nitidlom pag-ayo hinungdan sa paghubag sa iyang liog.
Sa wala pa ang operasyon, nasayran nga gitambagan kini sa bag-ong dentista nga mas maayong tibuok ug hingpit nga tangtangon ang maong ngipon.
Apan dihang gihimo ang operasyon, namatikdan ni Rhian nga nausab ang nawong sa dentista.
Pipila ka semana human sa pagkuha, nagsugod sa paghubag ang iyang liog ug sa pakigsulti niini sa dentista giresita lang kini og antibiotics ug vitamins.
Dihang wala gihapon mawala ang hubag, dili na niini makontak ang dentista.
Matod sa oral surgeon, wala gyud matangtang ang wisdom tooth nga angay untang kuhaon inay nawala kini sa lugar ug nabali ang bahin sa bukog sa apapangig sa pasyente.
Tambag sa surgeon nga kinahanglang mahibal-an sa kaubanag dentista ang limitasyon sa practice ug skills aron malikayan ang susamang komplikasyon.
