Gihatagan og gibug-aton ni Coach Ryan Jay Hernan, usa ka Recovery Coach sa Safehaven Recovery Village nga dako og papel ang pamilya sa usa ka tawo aron malikayan nga magkaproblema sa kahimsog sa pangisip ug moresulta sa pagkutlo sa ilang kinabuhi.
Mao kini ang iyang gipaambit atol sa pakighinabi sa Bombo Radyo Cebu gumikan ang ginikanan o sakop sa pamilya ang unang makahibalo sa kausaban sa kinaiya sa ilang kabanay ug kinahanglan nga sila usab ang mangunay nga mangayo og tabang sa uban hilabi na nga ang depression kay mahitabo bisan kanus-a.
Tungod sa mga sunod-sunod nga taho kalabot sa ‘suicidal incidents’ sa dakbayan sa Sugbo sa milabay nga semana gikuhaan og habig ang mga eksperto aron sa pagpasabot ug pagpalapad sa maong matang.
Matud niini nga ang depression kay dili ‘joke’ ug gikonsiderar nga usa ka ‘mental illness’ ug kon gani dili kini mahatagan og pagtagad o matambalan kay mosangpot kini sa pagdaot sa ilang kaugalingon o kaha sa ubang tawo nga anaa sa ilang palibot.
Hinungdan nga kung adunay mga timailhan sa mga simtomas kay mamahimo nga mosangpit sa mga ahensya nga makatabang kanila tungod kay aduna kini mga proseso ug counseling aron ma-assess ang tawo nga nakasinati sa maong sakit.
