Kulbahinam ang gibati sa pamilya ni Pinoy Weightlifter Elreen Ando, kinsang makigtigi sa umaabot nga kompetisyon sa 2024 Paris Olympics sa France.
Mao kini ang gipaambit sa iyang partner nga si Abegail Latonio Dejito atol sa pakighinabi sa Bombo Radyo Cebu.
Asoy niini nga bisan sa ilang gibati nga kakulba nga adunay kahinam, gisiguro nila nga gipakita ug gipaabot nila ang ilang suporta kang Ando alang sa umaabot nga Olympian games ug silang tanan nag-ampo nga maangkon niya ang medalya.
Dugang pa ni Abegail nga usa ka dungog ang pagsalmot sa Olympics, apan nanawagan gihapon si kini sa katawhang Pilipino nga suportahan ang tanang atleta sa Olympics.
Si Ando lumad nga taga Carreta ning dakbayan sa Sugbo ug sakop sa Philippine National Weightlifting Team human gi-scout nila ni coach Garry Toleno ug kanhi Olympian Ramon Solis niadtong junior high school pa siya sa usa ka sikat nga unibersidad sa Sugbo.
Kahinumduman nga niadtong Abril si Ando na-qualify sa 2024 Summer Olympics sa Paris human nakakuha og igong Olympic qualifying ranking nunot sa paghuman sa IWF World Cup sa Thailand.
