CEBU CITY – Nagsagul nga kalagut ug kasubu ang nasinati sa pamilya sa napatay nga si Ronda Mayor Mariano Blanco.
Sa personal nga pakighinabi sa Bombo Radyo sa kamaguwangan nga anak sa mayor nga si Marie Ann Blanco, kinsang mihangyu nga dili na una magpa-live o recorded interview, gibutyag niini sa Bombo News Team nga hustisya ang singgit dili lang sa ilahang pamilya inay lakip na ang tibu-uk katawhan sa lungsud.
Matud ni Marie nga daku nga sakripisyo ang gibuhat sa iyahang amahan arun lang nga muhatag ug serbisyo sa ilahang lungsud.
Nasayran nga mihunung sa pagka-seaman si Mayor Blanco arun nga musulud sa pulitika.
Gipadayag usab niini nga wala sila masayud nga adunay hulga sa kinabuhi ang ilahang amahan ug wala man usab kini magpakita kanila nga nabalaka.
Samtang mipaabut usab ug pahasubu ang mga mayor sa silingan nga lungsud ug usa na niini si Alcantara Mayor Beatriz Gaburnay kung diin gihulagway si Mayor Blanco isip tinu-ud nga tawu ug dedikado sa iyahang pagka-public servant.
Mi-abut usab sa haya sa mayor si Cebu Vice Governor Agnes Magpale kung diin gihulagway si Blanco isip hilumun ug kalma nga tawu.
Nanghinaut ang bise gobernador nga mugawas na ang resulta sa imbestigasyon sa pagpatay sa mayor sa mas dali nga panahon.
