CEBU CITY -Dili dawatun sa pamilya ni Philippine Air Force Sgt. Mark Herbert Oberes ang matud pa plano sa mga akusado nga sila si Resamarie Cabañog ug Engr. Joshua Garciano nga mahimong state witness batok sa miikyas nga mga suspek sa pagsunog patay sa maong biktima.
Gituohan ni Diana Oberes, ang asawa sa nahisgutang biktima, nga giplano ni Resamarie Cabanog ug sa inahan niini nga si Edna Cabanog nga patyun ang iyang bana. Ug wala tuohi niini nga adunay relasyon ang iyang bana ug si Resamarie.
Gibarugan usab ni Diana nga adunay utang si Resamarie ngadto ni Oberes nga nagkantidad ug 50 mil ka pesos, kini para igastos niini sa pagpatukod ug gamay nga negosyo.
Matud pa nga nagkabaton pa ug panaglalis niadtong milabay nga tuig kalabot sa wala pagbayad sa maong utang ni Resamarie ngadto ni Sgt. Oberes.
Dugang pa ni Diana nga mas makatabang sa dali nga pagresolba ingun man pagkasikop sa responsibilidad sa pagpatay sa iyang asawa, kung adunay himuon ang mga pulis nga special task group. Samtang, hustisya usab ang gipangayo sa duha ka anak nga lalaki nga nabiyaan ni Sgt. Oberes.
Sa pagkakaron, gihuwat nalang sa pamilya ang resulta sa gipahigayun nga autopsy sa sunog nga patayng lawas ni Oberes. Kung diin gihawa ang maong patayng lawas sa PAF member sa panimalay niini sa syudad sa Lapu-lapu.
Apan wala pa masiguro ang petsa sa lubong niini.
