Mipadayag sa ilang pasalamat ang pamilyang Cheng sa National Bureau of Investigation (NBI) sa gilusad niini nga parallel investigation kabahin sa trahedyang hit-and-run incident nga mipatay sa ilang anak nga si Kingston Ralph niadtong Pebrero 8, 2026 sa Maria Luisa Village, Barangay Banilad ning dakbayan sa Sugbo.
Sumala pa sa pamahayag nga gipagawas sa pamilya niadtong Huwebes, Pebrero 26 diin ilang giila ang paningkamot sa NBI sa pagkuha og mga ebidensya nga gikinahanglan sa ipasakang kasong Anti-Drunk and Drugged Driving Act of 2013 (RA 10586) batok kang Sean Andrew Pajarillo.
Gipasalamatan sab sa pamilya ang NBI sa konsiderasyon niini sa kabalaka sa epekto sa kakuwang sa field sobriety test, alcohol breathalyzer, ug chemical and drug test sa suspek.
Gipaambit niini nga andam ang ilang pamilya nga makigkooperar sa ahensya aron sa pagtimbang-timbang sa mga ebidensya.
Gisugyot nila sa NBI nga tabangan sila sa pag-imbestigar sa mga panghitabo human sa insidente ilabi na sa mga responsable sa nagpatuman sa balaod bahin sa maong kaso.
Malaumon sila ng ang resulta sa imbestigasyon sa NBI kay magpanikad og kabag-ohan sa pagpatuman sa balaod nga wala nay laing kabanay ang magtyabaw ug magbakho sa kasakit sa pagkawala sa minahal sa kinabuhi.
