CEBU CITY — Nagbangutan karon ang pamilyang Garcia sa sunud-sunod nga pagtaliwan sa mga kabanay niini nga mao si kanhi-Dumajug mayor Nelson Garcia ug si Barili Mayor Marlon Garcia.
“Mayor Marlon’s demise occurs 5 days after his brother, Mayor Nelson, passed on, also at Chong Hua Hospital,” sigon pa sa giluwatan niining statement.
Gikumpirmar sa giluwatang pamahayag gikan sa pamilyang Garcia nga gusto na unta nga ma-discharge sa tambalanan si Mayor Marlon aron ipadayon ang mga programa niini aron makabangon ang lungsod human sa COVID-19 crisis.
Kahinumdumang natakdan si Mayor Marlon sa sakit nga COVID-19 niadtong nakalabay nga mga semana.
Gihulagway sa maong pamilya si Marlon isip maayong lider sanglit kinasingkasing ang pag-alagad niini sa mga konstitwente isip mayor sa Barili.
Dugang pa sa statement nga nakigbisog gayud si Mayor Marlon hangtud sa katapusan niyang gutlo sa kinabuhi.
Nihangyo karon ang pamilyang Garcia og pag-ampo nunot na sa gi-atubang niini nga hagit sa kinabuhi.
Nitaliwan si Mayor Marlon Garcia niadtong Setyembre 6 sa kaadlawon apan wala pa gitataw sa pamilya kung unsa man ang hinungdan sa iyang kamatayon. /gn
