Gipahibalo sa Qatar nga nagpadayon ang panagsultihanay sa kalinaw tali sa Estados Unidos ug Iran, usa ka kalamboan nga nakaapekto sa pagkunhod sa presyo sa lana sa merkado sa kalibotan.
Matod sa Qatar, ilang gihisgutan uban ni U.S. President Donald Trump ug Emir Sheikh Tamim bin Hamad Al Thani ang mga lakang aron mapalapit ang Washington ug Tehran ug mapasig-uli ang normal nga operasyon sa Strait of Hormuz.
Apan, gipanghimakak sa Iran nga adunay pormal nga negosasyon uban sa Estados Unidos.
Giingon usab sa Tehran nga nagpadayon ang positibong panaghisgot uban sa Oman bahin sa luwas nga pag-agi sa mga barko sa maong importanteng ruta sa enerhiya.
Samtang, nagpabilin ang tensyon sa rehiyon human maigo sa projectile ang usa ka cargo vessel duol sa Strait of Hormuz ug nalunod ang usa ka barko sa India sa baybayon sa Yemen. Naluwas ang tanang 14 ka tripulante niini.
Gipadayag sa Qatar nga padayon kini nga nakig-alayon sa Oman ug Pakistan aron masuportahan ang paningkamot alang sa kalinaw, samtang naglaom ang mga opisyal sa Estados Unidos nga makab-ot ang kasabutan aron maablihan pag-usab ang Strait of Hormuz sa umaabot nga mga adlaw.
