CEBU – Gipasigarbo ni Architect Florante Catalan, ang pangu sa Cebu City Office of the Building Official (OBO), nga paspas na kaayo ang pagproseso sa building permit sa ilahang opisina.
Kini sukwahi sa nanglabayng katuigan nga maabtan pa og pipila ka adlaw una makuha ang maong permit.
Matod pa ni Catalan nga basta maka-comply dayon sa mga rekisitos ug makapasar sa inspeksyon makuha na diha-diha dayon inig human og bayad ang naasoyng dokumento.
Dugang pa ni Catalan nga nahimong posible ang mubo nga oras sa pagproseso sa mga aplikasyon sa building permit pinaagi sa pagpatuman sa OBO-Information System (OBO-IS) version 3.
Ang OBO-IS usa ka sistema nga gimugna sa City Government’s Management Information and Computer Services.
Nasayran nga daghan kaayog fixer kaniadto ang OBO gumikan dugay kaayo mopagawas og building permit hinungdan ang mga tawo kaniadto adto nalang moduol sa mga fixer apan karon nawala na kini gumikan paspas naman ang proseso sa ilahang buhatan.
