Magsaulog si Pope Leo XIV sa Adlaw sa mga Kalag uban ang ipahigayon nga Misa alang sa mga matinud-anon nga nangamatay, sa pinakadakong simbahan sa Roma.
Usa usab ka Misa ang ipahigayon alang sa kalag ni kanhi Pope Francis ug sa mga namatay nga kardinal.
Gipahibalo sa Vatican nga si Pope Leo maghalad og Misa sa Campo Verano Cemetery, duol sa Basilica ni St. Lawrence, sa Domingo, Nobyembre 2, sa alas 4 sa hapon.
Sa Lunes, Nobyembre 3, sa alas 11 sa buntag, maghalad usab siya og Misa sa Basilica ni San Pedro alang sa kapahulayan sa kalag ni Papa Francisco, kinsa namatay niadtong Abril, ug alang sa mga obispo ug kardinal nga namatay sa miaging tuig.
Kahinumdoman nga si Pope Francis, ang unang Santo Papa gikan sa Latin America, naghalad usab sa Misa sa Adlaw sa mga Kalag sa sementeryo sa Campo Verano sa unang tulo ka tuig sa iyang pagka-Papa.
Magtimaan si Pope Leo XIV sa mga pista sa mga Santos ug sa Adlaw sa mga Kalag karong kataposang semana pinaagi sa tulo ka sunod-sunod nga adlaw nga liturhiya sa Santo Papa sa Roma.
Mangulo usab siya sa Sabado, Nobyembre 1, sa pagsaulog sa Adlaw sa mga Santos ug sa Kalag, pinaagi sa usa ka Misa sa alas 10:30 sa buntag sa St. Peter’s Square, diin iya usab ideklarar si St. John Henry Newman nga usa ka doktor sa Simbahan.
Liboan ka mga pilgrims ang gilauman nga moapil, kadaghanan kanila sa Jubilee of Education sa Vatican, nga gibuksan ni Santo Papa Leo sa sayo ning semanaha.
