Nasikop ang usa ka pasahero sa Mactan-Cebu International Airport (MCIA) kinsang paingon sa Hong Kong human nadiskubrehan sa mga awtoridad ang P1.149 milyones nga wala ideklarang kuwarta sa Pilipinas sulod sa iyang bagahe atol sa routine screening sa Terminal 2 niadtong Hulyo 14.
Gibabagan sa checkpoint sa Office for Transportation Security (OTS) ang 26-anyos nga Filipino, residente sa Barangay Basak, dakbayan sa Sugbo, sa dihang ang mga X-ray operators nakakita og kadudahang mga hulagway nga susama sa mga pinutos nga kuwarta.
Daling gipahibalo ang insidente sa Bureau of Customs (BOC) ug Philippine National Police Aviation Security Group, (AVSEGROUP) hinungdan nga nasakmit ang P1,149,000 nga balur sa kwarta.
Napakyas usab ang maong pasahero sa pagdeklarar sa kantidad, nga matud pa milapas sa limitasyon sa Bangko Sentral ng Pilipinas nga P500,000 alang sa outbound transport sa local currency.
Nagdumili usab siya sa pagpirma sa gihuptan nga resibo sa bagahe ug mibutyag sa mga awtoridad nga wala alamag sa regulasyon.
Sa pagkakaron, anaa na sa kustodiya sa BOC ang maong kuwarta ug gibalhin sa ilang buhatan sa Terminal 2 Arrival Area alang sa tukmang disposisyon ug dugang imbestigasyon kabahin niini.
Gidugang usab ni PBGen Jason L Capoy, AVSEGROUP Director, nga ang insidente nagpakita lamang sa lig-on nga koordinasyon ug pagkaalerto sa mga sakop sa maong airport. | Bombo Nathaniel Sandoval
