Mabulukon ug puno sa kasadya nga giablihan ang opisyal nga pagsaulog sa Pasko sa Naga 2025 kagabii, Disyembre 8.
Ang dakbayan, usa sa mga gipaabot ug giatangan sa tibuok Sugbo tungod sa kanunay niining engrande ug makahuluganon nga pagsugat sa Pasko, napuno sa liboan ka mga suga ug mga Nagahanon.
Ingon man gidayo usab sa mga kasikbit nga dakbayan aron subling saksihan ang tinuig nga pagsugat sa Pasko sa Naga.
Gawas usab sa mga lumulupyo kay niduyog sa pasko sa Naga sila si Cebu Governor Pamela Baricuatro ug ang Vice Governor niini nga si Glenn Soco alang sa pagpaambit sa ilang suporta ug pagtimbaya sa Nagahanon.
Gipamatud-an usab sa Naga nga dili talagsaon ang ilang pagsaulog sa Pasko gumikan aduna silay giandam nga makaptandog sa kasing-kasing dili lang sa ilang dakbayan apan lukop tibuok Sugbo.
Diin pipila ka mga pangandoy ning umaabot nga Pasko ang natuman gumikan sa paningkamot ug tinguha nga adunay tam-is nga pahiyom gikan sa usa ka amahan nga nangandoy makita ug makauban ang nag-inusara niini nga anak nga anaa sa Manila, inahan ug igsuon nga nangandoy nga makauli sa Davao aron makauban usab ang 26 ka tuig na nga nahilayo nga anak ug igsuon.
Ingon man ang pangandoy sa mag-inahan nga makabaton og permanente nga puy-anan hilabi na nga dili makakita ang iyang anak ug tiguwang na usab kini.
Subay niini nagpadayag og pasalamat si Naga Mayor sa mga kaubang opisyal niini ug kagamhanan sa Probinsya sa Sugbo sa walay puas ug hunong nga pagsuporta sa ilang tinuig nga kalihokan.
Gihimug-atan usab ni Vice Governor Soco, nga ang pagsugat sa Naga sa Pasko kay testamento nga bisan paman sa unsa ka grabeng hagit ang mohapak sa Sugbo kay motigbabaw gihapon ang gugma sa mga Sugboanon.
