Gipasigarbo ni Presidente Ferdinand Marcos Jr. ang dako ug paspas nga kalambian sa mga dagkong expressways aron matabangan ang mga mamumuo, komyuter, estudyante, ug ang pagbiyahe sa mga produkto sa Sugbo, ubos sa lakang nga nagtinguha nga makunhuran ang oras sa biyahe ug makatipid sa krudo pinaagi sa paglikay sa mga dapit nga kanunay kahuot sa trapiko.
Matod pa ni Marcos Jr., importante kaayo ang pag-abli og dugang mga highway ug bypass roads sa mga highly-urbanized areas aron mapaspas ang lihok sa mga tawo ug kargamento, nga makahatag og dakong kaayohan sa lokal nga ekonomiya sa taas nga panahon.
Atol sa mga inspeksyon, nag-uban sila si Presidente Marcos, Public Works Secretary Vince Dizon, Trade Secretary Ma. Cristina Roque, ug Cebu Governor Pamela Baricuatro alang na sa pagsusi sa 4.55-kilometros nga Metro Cebu Expressway Segment 3A, nga naguba tungod sa nahitabong landslide niadtong tuig 2023.
Tungod niini, gimandoan sa Presidente ang Department of Public Works and Highways (DPWH) nga palapdan ug paspasan ang dagan sa konstruksyon sa maong proyekto aron mapahimuslan na kini sa kapin 3,000 ka mga mamumuo sa industriya, mga komyuter, ug mga drayber karong Hunyo o Hulyo 2026.
Na obserbaran usab sa Presidente ang kalamboan sa maong agianan ubos usab sa pasalig sa DPWH niadtong Enero nga humanon kining maong proyektoha sa dili pa moabot ang ting-uwan.
Kini nga proyekto, nga nagsugod sa Brgy. Pangdan hangtod sa Brgy. Inayagan sa siyudad sa Naga, gilauman nga makapamubo sa naandang 35 minutos nga biyahe gikan sa Naga City padulong sa N. Bacalso Avenue sa Metro Cebu ngadto na lang sa 15 minutos.
Ang upat ka lane nga dalan naglakip sa paghimo og mga kanal, pag-aspalto, pagpabarog og mga paril sa kilid sa bungtod aron malikayan ang landslide, ug mga trabaho alang sa pagpanalipod sa palibot.
