Patayng lawas sa 62 ka mga pasahero sa nahagsa nga eroplano sa Brazil, na-recover na

Narekober na ang tanan nga patayng lawas sa mga pasahero sa nahagsa nga eroplano sa Brazil.

Sumala sa mga awtoridad sa Brazil, nakit-an usab nila ang itom nga kahon sa ATR 72-500 nga eroplano sa lugar nga nahagsa sa lungsod sa Vinhedo, nga 80 kilometros gikan sa Sao Paulo.

Sa kinatibuk-an nga 62 ka mga lawas nga gilangkuban sa 34 ka lalaki ug 28 ka babaye ang gidala sa morgue sa Sao Paulo alang sa pag-ila sa pamilya.

Kahinumduman niadtong Biyernes dihang nahagsa ug nibuto sa balay ang nahisgutang eroplano nga gipadagan sa kompanya nga Voepass.

Sa pagkakaron, nagpadayon pa gihapon ang imbestigasyon sa mga otoridad sa maong insidente.